喺武漢肺炎嘅影響之下，買口罩已經變成香港人嘅日常活動之一⋯⋯無論你係去藥房排隊定係上網買口罩，都要睇清楚點樣揀口罩先係正確選擇，如果揀錯咗嘅話係無辦法預防病菌架！今次就同大家講講應該點樣揀口罩，認清口罩功能！
買口罩點揀好？教你認清各種口罩功能
基本上使用外科口罩已經足夠防範，N95 其實係相對焗促，一般情況下都無須用到 N95 咁高配備，大家都係留返啲貨源俾前線醫護人員啦！而布質或者海棉質地嘅口罩都係用作過濾花粉或者塵埃，活性碳口罩只可以吸除異味，幾款都係完全沒有防疫效果架！外科口罩絕對係大家嘅最佳選擇，至於挑選外科口罩時則可以根據以下現有測試標準：
1. BFE/PFE/VFE
口罩喺推出市面前需要通過各種過濾測試，亦需要於包裝上清楚列明其效率。大部分口罩都會透過 Nelson Laboratory Standard 進行測試，而日本口罩包裝上最常見嘅 BFE、PFE 以及 VFE 就係呢個測試中用作標示不同大小微粒嘅過濾率測試結果。
| 標準 | 針對微粒大小 |
|---|---|
| BFE (細菌過濾率) Bacteria Filtration Efficiency |
3 微米 |
| PFE (顆粒過濾率) Particle Filtration Efficiency |
0.1 微米 |
| VFE (病毒過濾率) Virus Filtration Efficiency |
0.1 – 5 微米 (平均 2.8 微米) |
咁其實即係要點揀？一般都會以百分比代表嗰款口罩對不同微粒嘅過濾率，要有效預防感染源的話就必須通過 PFE 測試先算符合標準。如果該款口罩只係得 BFE 的話其實係不足以阻擋來自飛沬嘅病毒架，所以選購口罩時如果只標明 BFE 功效就唔建議購買喇。簡單講揀選由日本出產嘅口罩時最少要有 BFE+PFE，如果有哂 3 項測試當然係最好啦～但而家一罩難求嘅情況下亦要學識取捨！
2. ASTM Level
大多由美國地區出產嘅口罩都會使用呢個測試標準，口罩嘅防護強度分為 Level 1 至 3 個等級，Level 1 為最低，Level 3 為最高，同樣都有以 BFE 及 PFE 進行測試，再加上另外 3 個準則：Fluid Resistance to synthetic blood（對合成血液的液體阻力）、Delta P（壓力差）及 Flammability（阻燃程度）進行檢驗。
| BFE | PFE | 液體阻力(mmHg) | 壓力差 | 阻燃程度 | |
|---|---|---|---|---|---|
| Level 1 | ≥95% | ≥95% | 80 | <4.0 | Class 1 |
| Level 2 | ≥98% | ≥98% | 120 | <5.0 | Class 1 |
| Level 3 | ≥98% | ≥98% | 160 | <5.0 | Class 1 |
唔同 Level 嘅口罩最大差別為對合成血液的液體阻力，如果唔係前線醫護人員的話其實影響並不大，而不同 Level 嘅 BFE 及 PFE 功效則相差 3%，如果買到 Level 3 當然最好，但次等款式亦唔等於差好多，亦一定比沒有列明 ASTM 標準嘅產品為佳。
3. KF（Korean Filter）
「KF」為韓國保健局指定嘅口罩等級，市面上有「KF80」﹑「KF94」以及「KF99」共3種類型。
KF80：有效阻擋約 80% 來自空氣中，大小為 0.6 微米嘅微粒，只能防禦沙塵及空氣污染微粒，不能阻隔感染源
KF94：有效阻擋約 94% 來自空氣中，大小為 0.4 微米或以下嘅微細粒子及感染源
KF99：有效阻擋約 99% 來自空氣中，大小為 0.4 微米或以下的微細粒子及感染源
單睇數據當然會想挑選最高規格嘅「KF99」，但由於售價非常昂貴，韓國民眾一般都會選購「KF94」，其實亦已足夠抵擋感染源架喇～
4. PM 2.5
如果口罩包裝上標明「PM 2.5」代表該款口罩可以有效阻擋空氣中直徑為 2.5 微米或以上嘅細懸浮粒子，一般都係針對空氣污染或沙塵暴等而設嘅防護，對於今次嘅肺炎係無效用架～所以如果款口罩淨係得「PM 2.5」的話今次就唔啱用喇～
🚩 網購口罩與集運的常見問題：http://bit.ly/2Gz1XPF
由於日本倉庫已超出負荷，建議大家可到美國網購相關產品