咁又一年喇！原來今年已經係 Buyandship 第 4 年幫大家轉運 Thanksgiving 同 Black Friday 戰利品，小編們都熱緊身，準備一年一度跳出崗位幫手拆貨。喺未拆貨之前，當然要同大家講下血併黑五有咩注意事項啦。其實美國特別重視「感恩節」Thanksgiving 呢個節日，就好像香港人過農曆新年一樣咁普世歡騰，而緊隨其後兩日嘅 Black Friday 同 Cyber Monday 更係會令全球市民為之瘋狂。一連串大劈價，產品有機會以低至三折或以下發售，唔少市民仲係捕住全年最抵呢一日掃荀貨添。
以為淨係可以網購美國產品？錯喇，其實全球網店包括英國、日本等地方都會跟隨做 Black Friday 優惠，只要好好把握呢一日，買齊美日潮牌同英國家電就絕對無難度！想喺當日更順利搶貨？你哋除咗要準備足夠「彈藥」，我哋亦準備咗呢篇網購轉運全攻略，確保大家搶貨時快、狠、準，極速以更抵價搶購到心頭好。
1. 鎖定 Thanksgiving / Black Friday / Cyber Monday 日子
．Thanksgiving－美國時間 2018年11月22日（星期四）
每年十一月第四個星期四都定為 Thanksgiving（感恩節），而今年就係美國時間 11月 22日。大部份嘅網店包括時裝飾品、鞋類、嬰幼兒產品、玩具、個人護理、運動或戶外用品、電子產品等等都有抵 Deal 折扣，絕對係 Black Friday 嘅前哨戰。唔少網店都會喺 Thanksgiving 前幾日已經開始 Pre-Sale，怕產品斷碼或售罄嘅朋友可以搶先網購！
．Black Friday－美國時間 2018年11月23日（星期五）
今年會喺美國時間 11月 23日正式展開，即係全年最抵嘅一日！半價？三折？唔止啊！各大網店喺當日會推出「One Day Deal」或「24 Hours Flash Sale」等限時優惠，有機會係一折就買到心頭好，咁抵 Deal 嘅日子網購迷萬勿錯過。
．Cyber Monday－美國時間 2018年11月26日（星期一）
美國時間 11月 26日，主要優惠產品類別係各大電子產品，例如電腦、手機、數碼相機、音響、遊戲設備等。當然唔少其他類別產品例如時裝或家品等嘅優惠都仲未完，仲未買夠嘅你可以繼續搏殺。
2. 留意開賣時間
美國東岸西岸相差三個鐘，而大部份網店多數跟從西岸時間開始折扣。今年 Black Friday 會喺美國時間 11月 23日零時零分開始，即係香港時間 11月 23日下午 4點。（但當然唔少 discounts 會預早開始㗎喇！）而英國、日本等地部份網店都會喺當地時間 11月 23日做 Black Friday 優惠。
3. 準備購物清單及預先開設網店帳戶
相信唔少朋友平時都睇開網店，都好清楚自己想買邊啲 items。咁就啱喇，就由呢一刻開始預先準備好購物清單，將產品 Bookmark 或加入網站 Wish List，因為喺 Black Friday 呢個全年最抵嘅日子，絕對係手快有手慢無，當日只要優惠價一推出就直接將產品加入購物車，Checkout 時就可以更快人一步啦。
想再快啲？梗係預先開設定網店帳戶，填寫埋海外倉庫地址，咁就萬無一失喇。登入取得海外倉庫地址：http://bit.ly/1JAIUwe
4. 了解付款方式及準備多張有效信用卡
部份海外網店唔接受海外信用卡，就好似以熱門行李箱品牌 Samsonite 或鞋類品牌 Toms 為例，只接受以 Paypal 作為付款方式。為避免有 Cut 單情況而錯失折扣優惠，可預先申請 Paypal Account 有兩手準備。同時，記得預先申請多張有效信用卡，建議使用張曾經於外國網站購物成功嘅信用卡，以及加大簽帳額。
5. 於多個網站格價
有睇開我哋優惠資訊嘅朋友，都知道產品唔一定要喺官網買。就好似買波鞋嘅話，除咗可以去官網睇之外，其實唔少大型熱門波鞋網店例如 Eastbay、Footlocker、Shoes.com 等都有出售，有時折扣更比官網優惠更抵添。
6. 選定轉運公司
大部份美國網站都無提供直送香港嘅服務，就好似 Amazon、Ralph Lauren、GNC、Carter’s、Eastbay 等網店都唔會送貨到海外，只限寄美國本土。所以預先開設 Buyandship 帳戶，拎定海外倉庫地址就可以喺 Black Friday 時無後顧之憂咁血併，減少揀好心頭好先發現未能送港嘅煩惱！