Black Friday 小編推介 – 毛孩篇

一年一度嘅瘋狂購物日 Black Friday 又到啦!除咗買嘢俾自己同買嘢俾屋企人之外,當然唔少得要買嘢俾你嘅毛孩啦!趁住 Black Friday 咁多勁減優惠,等小編介紹下啲又可愛又實用嘅寵物用品啦!

作為一個打工仔,一年去返三五七次旅行放鬆下係好合理嘅。但係去旅行時又要擔心無人餵主子,又唔想搵三唔識七嘅人嚟幫手照顧咁點算呢?嗱小編就有個好推介啦 – Petnet 嘅自動餵飯器可以用 Wifi 控制,設定食飯時間同份量。無論去到邊,只要有得上網就唔使擔心主子無飯開啦~

呢招對於成日要聽到主人把聲先安心嘅狗狗或者特別痴人嘅貓咪嚟講當然唔夠啦。加上大把人好似小編咁真係見少主子一陣都唔得㗎嘛!如果係咁嘅話你就要買埋呢一部 Furbo Dog Camera 啦。佢除咗有廣角鏡同支援 FULL HD 之外仲有 Night cam 功能,咁就無論幾時都可以望到佢哋啦。除此之外呢部機仲有個 barking sensor,如果主子吠就會通知你,等你可以同佢講嘢氹返主子。同 Petnet 餵飯器一樣,只要你上到網就可以控制到部機㗎喇~

聖誕節又就快到,主子們就梗係要執靚仔/女啲見人啦。除咗要買個好用嘅梳頭手套幫主子梳毛之外,剪指甲就當然唔少得啦。小編個幾位主子每次淨係見到個指甲鉗都驚到跑嚟跑去又左郁右郁,真係勁驚會整親佢哋啲手仔腳仔呀。好在俾我發現咗呢一個自動磨甲器,剪指甲就易過借火啦。

除咗呢一系列咁實用嘅生活用品之外,又點可以唔介紹一下各款床仔、狗帶、同寵物服飾呢?如果你好鍾意迪士尼嘅話,就要快啲去望下佢哋嘅寵物配件系列啦。一張寵物床最平賣緊 US$25(約 HK$195)咋,平時行過普通寵物店買個不知名牌子嘅寵物床都未必得,計落真係超抵買㗎!