美英日 Thanksgiving / Black Friday 時裝飾品網店推介

話咁快又過一年,又嚟到全年最大型嘅折扣日 Thanksgiving、Black Friday 以及 Cyber Monday 喇!想買平嘢真係唔洗走去同人迫嘅,只要你識得用轉運,安坐家中一樣享受到海外嘅折扣!咁多個牌子一齊做折扣搞到無從入手?唔緊要,即刻睇我哋為大家準備嘅時裝飾品網店推介,睇吓呢個大型節日買咩衫最抵啦!


Ralph Lauren

咁大型嘅折扣日點可以唔睇睇呢間最受歡迎嘅時裝店呢~喺香港買一件隨時過千蚊,網購只係需要幾百甚至幾十蚊已經買到件,最低價 US$4.89(約 HK$38)就買到件 Tee,真係仲抵買過雜牌子!今年 Black Friday 都一定要睇實佢哋嘅優惠,大手入貨!

Superdry

想平平哋只件褸?Superdry 真係最佳選擇,記得真係唔好走入門市買,因為網購實在係抵太多喇!大熱款 Windcheater Jacket 最平只需 US$69.65(約 HK$545),而香港專門店賣緊 HK$1,380,平香港一半有多,點計都係網購抵啦~

             

Tory Burch

相信唔少女士們都打算喺 Black Friday 入手返幾個包包,Tory Burch 絕對係其中一個目標!呢個牌子嘅款式較成熟,返工用真係啱哂!香港門市買就當然貴啦,網購絕對抵過香港門市!除咗經常都有減價款式低至半價之外,仲會推出七折優惠,相信大型折扣日會有更加抵嘅 Deals 出現!

MLTD

平時鍾意買潮牌嘅朋友仔,無理由唔識 MLTD 啦!佢集合哂多個歐美潮牌,想買啲咩喺呢度一次過揀哂就得!Stussy、Obey、RIPNDIP、Alpha Industries、HUF 等品牌都可以搵得到,絕對比起水貨舖平得多呀!平時做開七折嘅佢哋,相信喺 Black Friday 會再下一城推出更高折扣!

Steep & Cheap

平時想買戶外用品品牌嘅嘢都一定係網購,平過香港專門店好多之餘又多款揀,買多幾件都唔心痛!Steep & Cheap 主要售賣限時限量嘅特價貨品,價錢比起其他網店更加抵,而且做減價嘅都係大牌子,想買 The North Face、Arc’teryx、Columbia、Marmot 等牌子的話記得睇實呢個網!

Eastbay

任何時候都想買鞋,有優惠時就更加要買!Eastbay 喺往年 Black Friday 期間做過半價優惠,想買鞋真係要睇實佢哋!熱門品牌 Nike、Adidas、Vans、Puma 等等都一應俱全,而除咗鞋之外亦有其他運動用品及服裝,Hoodies、外套、襪款等都可以搵得到!

Kate Spade

想買袋嘅女士們,又或者想買袋送俾女朋友嘅男士們又點可以唔睇吓 Kate Spade 呢!上年 Black Friday 佢哋就推出 Surprise Sale,折扣低至二五折!長銀包最平只係 US$39(約 HK$306)! 有啲仲有組合優惠,用 US$99(約HK$776)買到一個長銀包同細袋,咁抵嘅價錢真係網購先做到!

6PM

想買名牌除咗睇官網之外亦唔少得 6PM 呢個名牌 Outlet,集過百個名牌於一身,Coach、Tommy Hilfiger、Calvin Klein、Michael Kors 等都可以喺呢度買到,往年折扣優惠更加低至三折!鍾意買名牌的話真係唔可以睇漏呢個網呀~

Ted Baker

呢段期間除咗美國網店會有優惠之外,部分英國網店都會推出折扣!如果想買手袋的話就可以留意一吓 Ted Baker,佢哋折扣曾經低至半價,點都抵過喺門市買呀!佢哋優雅得嚟又較年青,無論返工定返學都合適!

Zalando

英國 Zalando 平時已經多折扣,相信 Black Friday 期間會更加抵!喺呢間網店可以搵到各款波鞋,包括歐洲限定款或 Zalando 限定款式,其他網店搵唔到架~另外佢哋亦有大量服飾選擇,Mango、Levi’s、Calvin Klein、Hugo Boss、Kenzo 等品牌都可以喺呢度買到!

Zozotown

呢個大節日就連日本網店都有機會有大減價!鍾意日牌嘅你又點可以錯過 Zozotown 呢~基本上講得出嘅日牌都可以喺呢度買到,佢哋亦曾經做過低至一折嘅優惠,平買日牌真係唔洗飛過去,喺屋企一樣做到!