網購都有「利是」逗!TopCashBack 回贈教學!

今個新年大家逗咗幾多利是呢?多咗錢又可以買嘢啦~其實除咗新年有利是逗之外,平時網購都一樣可以有錢回贈架!講緊就係外國非常流行嘅回贈網站,網購同時有回賺,識得玩就可以慳得更多錢!只要跟足教學,養成用回贈網站嘅習慣就可以買得更精明慳得更盡!


外國其實有好多回贈網站,不過當中就以 TopCashBack 最多人使用,因為佢哋嘅回贈比率較高,就以大家經常購買嘅網站為例,Eastbay、Moosejaw、GAP 等網站嘅回贈比率為 10%,Amazon 亦有高至 6% 回贈,就連 Ralph Lauren 都有 5% 回贈!回贈返嚟嘅錢可以轉入 Paypal 戶口或換成 Amazon Gift Card,變相網購時再有折扣!點解會有得回贈?簡單嚟講就係只要有客戶經回贈網站嘅連結去到網上商店買嘢,商戶就會俾返介紹費俾回贈網站,網站再將部分介紹費送返俾客戶!咁樣就大家都有得益啦~


用法其實非常簡單,首先於網站 https://www.topcashback.com/ 上註冊帳戶,通過電郵驗證後就可以開始經佢哋連結買嘢!


登入後可於各個分類睇返有邊啲網店參與回贈計劃,亦可於箭嘴位置搜尋你想要嘅網店,如果無顯示的話就代表你所揀嘅網店無參加回贈計劃。


就以有 10% 回贈嘅 Eastbay 為例,入面會介紹返網站係出售邊類型商品以及注意事項。如果有 Promotion Code 的話亦會喺呢一頁中顯示,而呢啲優惠碼係可以同 TopCashBack 回贈計劃同時使用,提醒你點樣可以買得更平!


點按「Get Cashback Now」,或點按 Promotion Code 旁邊嘅「Get Cashback & Code」後,網站會彈出一個新視窗,將你自動導向你所揀選嘅網店。


要留意所有交易都需要於自行彈出嘅新視窗中進行,亦要於原本頁面確認 TopCashBack 是否有記錄到你嘅行蹤(如圖 1),否則 TopCashBack 就無辦法記錄你嘅交易,咁就拎唔到回贈架喇!確定已經記錄好的話,就可以進入網店如常購物喇~


成功交易後 TopCashBack 會 Send E-mail 俾你確認回贈金額,亦可以於 TopCashBack 網站上確認戶口內嘅回贈,只需點按右上角嘅「Account」後再點接「Earnings」就可以清楚見到所有回贈。當回贈金額入到你嘅戶口後就可以轉返入自己嘅 Paypal 戶口,賺取回贈就係咁簡單!


咁簡單就可以賺到回贈,以後買嘢前記得要上 TopCashBack 睇睇有無得回贈先喇~而回贈比率亦會隨時有變動,一切都以 TopCashBack 網站為準。小編提提你,除咗網購之外,訂機票酒店都一樣可以用到 TopCashBack!詳細就上返佢哋網站睇睇啦~除咗 TopCashBack,我哋 BuyandShip 都一樣有回贈架!只要你喺申報貨件時剔選分享產品資訊,每 1磅可以得到 1個積分!詳情睇返:http://bit.ly/2h6s4Qc

TopCashBack 官網:http://bit.ly/2DZSIZ4